وأكدت مصادر مقربة من النادي أن الغضب سيطر على مسؤولي الترجي، وبالأخص رئيس النادي حمدي المدب، الذي عبّر عن استيائه الشديد تجاه أداء اللاعبين والجهاز الفني بقيادة المدرب الروماني.
وعلق الإعلامي سمير الوافي قائلا: المدربين الكل خايبين...والبقية الكل في الفريق باهين وناجحين وكل شي ماشي في الترجي...وديما المدرب هو الغالط والخايب والفاشل...وكل مرة ما يتبدل كان المدرب...مدرب ماشي ومدرب جاي...وغضب الجمهور يتحملو المدرب وحدو...يظهرلي لازم نفيقو اللي المشكلة موش في المدرب...وتبديل المدرب موش الحل...لازم برشة مراجعة في الإدارة وفي التشكيلة وفي اللي يستحقو يلبسو المريول الغالي والتاريخي متاع الترجي...لازم صناعة القرار تولي أوسع وأشمل من شخص أو زوز...لازم هيكلة إدارية جديدة وضم كفاءات ترجية للهيئة والإدارة...وتلبية طلبات المدرب قبل محاسبتو...وعدم الإستخفاف بزي الترجي في اختيار الملاعبية...لازم...ولازم...ولازم...!!!
الوحيد اللي أنتوشابل في الترجي هو رئيسها حمدي المدب...اللي المنافسين الكل وكارهي الترجي حاسدينها عليه ويتمناو رحيلو...وعمرو ما خذل الترجي وقت اللي الفرق الكل دمرها الخذلان...لكن هذا ما يمنعش أنو مطالب ببرنامج إصلاحي عاجل...وبإعادة هيكلة لإدارة الفريق...وبتشريك كبار وكفاءات الترجي في صناعة القرار...وبتلبية مطالب المدرب حتى تكون محاسبتو موضوعية...وبمراجعة الرصيد البشري للفريق...!!!
ماتش العمران إنذار مبكر...في وقتو...قبل وقوع الفأس في الرأس...وعسى أن تكرهوا شيئا وهو خير لكم...نكتشفو الخلل ونفيقو م التخميرة في ماتش العمران...خير من صدمة كبيرة ومتأخرة في ماتش سان داونز...المهم نصلحو ونراجعو ونعدلو قبل فوات الأوان...والله المستعان !!!