مدونة "الثورة نيوز - عاجل": نص المقال - مرة أخرى جريدة يومية بودورو مهبطة مقال في الصفحة الأولى تناشد فيه ضمنيا في إدارة موزاييك باش "تضع حد" "للتجاوزات" و "اللغة الهجينة" و "الألفاظ النابية" متاعي، قال شنوة موزاييك إذاعة هايلة و ناجحة و أنا نشوه فيها، خاطر مادام النهضة تنحات مالا أنا "بابوري زفر" و لازمنا خطاب بناء و مسؤول موش خطاب هدام إلخ إلخ...
أولا نحب نهني باعث جريدة "السور" بفشل مسعاه في دفعي للحديث عن شوليقتو في معرض الصحافة متاعي اللي فسختها منو منذ أشهر، مانيش زكيم ليه باش كي يقوم يسبني نعمللو إشهار، و ثانيا نحب نطمنو انو التلحيس لإدارة موزاييك و مطالبتها بطردي ما عندو وين يوصل، خاطر فمة ما أكسح منو ببرشة حاولوا و فشلوا، موش بحاجة أما خاطر فقرتي الفاشلة اللي "بابورها زفر و ما عاد يسمع فيها حد" هي انجح فقرة بعد سايس خوك و الرياضة حسب نسب المشاهدة، موجودة قبل حكم النهضة و قاعدة بعدها و ما يوصل حتى كربي يخدم بيها مبعد يطيشها كي يكمل يقضي قضيتو.
ثانيا نجدد من خلالو الدعوة لكل من عندو رغبة في إنو يشدني من أعلى قمة و نطالبو باش يمشي يشكي بيا طول للسلطة التعديلية الساهرة على قطاع الإعلام، خليني نتحاسب و نتعاقب على "تجاوزاتي" بأمور قانونية يا خويا، موش خير من التلحيس لإدارة موزاييك فماشي ما تطردني ؟ يلعن بو طحينكم ما أرخصكم و ما أذلكم عباد !
و هاذي ضربة على الحساب باش ما نعملش قاوق للكلاب، و ما يدوم في الواد كان حجرو !
هيثم المكي
