مدونة "الثورة نيوز - عاجل": بقلم هيثم المكي - وتنطلق على بركة الله الحملة الإنتخابية لسليم الرياحي شهر ماكسيميليانو تحت شعار "يحكمني واحد شبعان خير على الأقل ما يسرقش"، كاينو هالشبعان قنوع و مستكفي بالفلوس اللي عندو، و يحب على السلطة جوست باش يخدم الوطن و يشيخ الشعب و يعطي لكل مواطن ألف درهم، أما القصر و الثلاثين مليون في الشهر و خاصة السلطات و العلاقات المحلية و الدولية اللي قادرة تردو "شبعان" أنتارناسيونال موش جوست في بلادو، فماعينوش فيها و هو عنها متعفف، كاينو هالنوع من التماسيح متاع الفلوس و السلطة تعرف الشبع ولا القناعة... عقلية العبيد عاشقي السلاطين في أبهى تجلياتها.
هو تجي تشوف بالرسمي، سليم الرياحي شبعان و نيتو صافية و يحب يخدم البلاد، هذاكة علاش لطخ المعامل و الشركات و المشاريع التنموية و عمل بفلوسو حزب و شرى قناة و رئاسة جمعية، ثم و دائما في نفس السياق لطخ خبراء الإقتصاد و المالية و حط برهان بسيس مستشار عندو... لكلها في إطار الشبع و النية الصافية و الرغبة في خدمة الشعب اللي يموت على الكرامة ليس إلا، يلعن بو الفلوس و السلطة.
