ليلى طوبال: “ستة سنين بعد الثورة ما زلنا ما فرحناش..تونس الياقوتة ما زالت إمّرغدة في التراب”
اشترك في خدمة "الأخبار العاجلة" واحصل على أحدث وأهم المستجدات لحظة بلحظة:

يوم 17 ديسمبر 2016


نشرت المسرحية ليلى طوبال التدوينة التالية على صفحتها الخاصة بموقع الفايسبوك بمناسبة احياء الذكرى السادسة لثورة 17 ديسمبر:

“17 ديسمبر 2010… شعّل البوعزيزي روحو وشعلت البلاد .. وخرجت الناس للشوارع تصيح شغل حرية كرامة وطنية… وتحرّكت ماكينة القمع… وخيّط الكرطوش… وبداو الشهداء يقدمّوا في دماءهم عربون التحدّي والصمود… والناس في المدن والأنهجة والشوارع تصيح أوفياء أوفياء لدماء الشهداء… فاض الكاس وخرجت الناس وما وقّّفها شي…

نتذكّر كل تفاصيل التحركات … الحاجة الثابتة إلّي وقتها كل وحدة كل واحد فينا معرّض روحو للموت وحتى حدّ ما كان خايف… الناس تغزر لبعضها … تهزّ بعضها… تحط يديها في يدين بعضها وتصدم وتصيح لا خوف لا رعب السلطة ملك الشعب… أيامات الثورة هوما الأيامات إلّي حريّة الوطن ولاّت أغلى من كل شيّ… والناس إلّي تفرّجوا في تلافزهم يستنّاو آش كون باش يربح المعركة با ش يتموقعوا … ما ينجّموش يحسّوا وما ينجّموش يستوعبوا وما ينجّموش يصدّقوا إلّي آلاف كانوا مستعدين يموتوا من أجل الحرية والكرامة… 

اليوم كل شيّ مرتبط بالثورة يحبوه يتفسّخ … يتبدّل… يتزيّف… الثورة إلّي سرقوها… الثورة إلّي غدروها والحلمة إلّي اغتصبوها… 

17 ديسمبر2016 … ستّة سنين من بعد ما زلنا ما فرحناش… ما زلنا ما بنيناش… تونس الياقوتة ما زالت إمّرغدة في التراب… آما عمري ما أيّست… هاذي البلاد لينا… تونس متاعنا… تونس الأرض… تونس الأم … تونس الروايح الفاوحة والألوان الزاهية لينا… 

للناس إلّي يتصوّروا لحظة كونا انجّموا نتخلاّو على الحلمة الكبيرة وعلى الوطن… كان جيتوا عملتوا الثورة وشفتوا الغضب والتحدي والصمود متاع التوانسة راكم أيّستوا من زمان… حتى شيّ ما يخوّفنا… لا عودة اليكتاتورية ـ وهذا لن يحدث ـ … ولا إسلامكم الغاضب… ولا دواعشكم التائبين… ولا مخازن الأسلحة ولانفاقكم على خاطر نفاقكم أخطر مالكرطوش… ولا ولا ولا ولا
ما نيش نادمة عالثورة… مانيش حزينة… ما نيش مأيّشة… مانيش خايفة… باش نقعد نكتب عالأمل… وكل يوم الصباح … نعنّق تونس ونقلّها قدّاش نحبّك… للّي نموت
المجد والخلد للشهداء
عيد ميلاد سعيد ثورة الحرية والشغل والكرامة”

المصدر: الجمهورية

Les dernières infos et l'actualité de la Tunisie classée par thèmes: Politique, Economie, Culture, Sport, Régions, annonces, Sciences. Découvrez gratuitement et en temps réel tous les articles, les vidéos et les infographies de la rubrique Tunisie sur 3ajl.info