يكشفها طبيب شاب: فضائح بالجملة بالمستشفيات الجامعية بصفاقس
اشترك في خدمة "الأخبار العاجلة" واحصل على أحدث وأهم المستجدات لحظة بلحظة:

يوم 20 نوفمبر 2016

نشر احد الاطباء الشبان مقالا بموقع الصحفيين التونسيين بصفاقس كشف فيه حجم الفساد بالمؤسسات الاستشفائية الجامعية بالمنطقة تكتشفونها ضمن هذا المنشور..

“محكينا كثيرا عن الفساد في المستشفى الجامعي الحبيب بورقيبة … هات نحكيو شوية على فساد الأطباء و اللي يمشي ضحيتو المريض و خاصة الطبيب الشاب اللي يعفسو عليه و يحطموه فيضطر ان ينساق مع التيار او ينقُم و يهج و يخليهالم واسعة يرتعو فيها.
عن بعض رؤساء الاقسام احدثكم، اغلبهم يعملون ويتعبون ولكن بالنشاط التكميلي طبعا ، وحتى اللي يجي يرقد يولي يزن عليه في لازمك تشق تو ما كانش تموت اما احنا في الصبيطار ما نجموش، اخرج البرا نشقلك تو تروح غدوة لاباس. اما الحديث عن جدول العمليات (programme opératoire) الذي يخضع للجهد …. و جيبك يا علاف و تليفونات و كادوات باش فولان و فلتان يتحط هو اللول. المرضى تتكنتر و يخرجوها البرا تشق خايفين مالموت و الجرثومة في الصبيطار يلعبولهم بمخاخهم اطراف عديدة يعملو في شنتاج للمرضى و هي ممارسة شبه يومية و تتم كالآتي: يجي المريض تصيرلو التحاليل و الصور اللازمة نحطوه يطيب شوية هو و اهلو لين يطيب بالباهي و يولي يغفق وترصيلو في المصحة و يروحوا الناس الكل فرحين مسرورين كان الزوالي جيبو يتنتف و شوف يعيش شوف لا. الطريقة الثانية و المتداولة أكثر حتى في أقسام أخرى: يجي مريض للعيادة الخارجية (خاطي رئيس القسم أكيد اللي يعدي كان نشاط تكميلي بالفلوس) يعديلو الطبيب المقيم و من بعد كي تطلع حالة مزيانة و امورالمريض المادية منعوشة يجي السيد الممرض المسؤول على العيادة الخارجية يدور بهاكا المريض و عايلتو حتى يقتنع المريض اللي دواه كان عند رئيس القسم في الخاص و يتكنتر هاك الدوسي من غادي الغادي و عنين الطبيب المقيم تغزر. معاناة المريض لن تقف عند الجانب المادي لتصل الى تصرّفات بعض الممرضين والطريقة التي يعاملونهم بها فيها الكثير من الغطرسة ومسكين الي ما عندوش كتيّف
نمر الآن إلى المستشفى الجامعي الهادي شاكر، وفيه الأقسام الاكثر حساسية وهو قسم الأطفال وقسم القلب وما ذكرناه في حق مستشفى الحبيب بورقيبة بنطبق على مستشفى الهادي شاكر الذي تدور في اقسامه فضائح ومشاكل عديدة وتتصرّف فيه احيانا اشخاص بعيدة عن الطب هذا فيض من غيض وشهادة ادلى بها للموقع طبيب قال انه عانى الظلم والهوان و” التمقيص” لدرجة ان تلقت اعصابه وقرر ان يهجر هذه المؤسّسات الصحيّة ….شهادته بشهادة الجميع فيها الشيئ الكثير من الحقيقة وما تردي الاوضاع في القطاع الصحي العمومي بصفاقس الا نيجة مثل هذه التصرّفات التي لم تجد من يردعها فكل فول لاهي نوارو..

طبيب شاب”

المصدر: الجمهورية

Les dernières infos et l'actualité de la Tunisie classée par thèmes: Politique, Economie, Culture, Sport, Régions, annonces, Sciences. Découvrez gratuitement et en temps réel tous les articles, les vidéos et les infographies de la rubrique Tunisie sur 3ajl.info